AXARI TRAIL 2013

Joan de Igandean Idiazabalera abiatu ginen. Bertan Axari Trail lasterketaren lehen edizioa ospatzen zen eta Euskal Kopako froga izateaz gain, lasterketa hau berria zen eta horrek beti pizten digu dortsala jartzeko gogoa.

Jakina da Euskal-Herrian mendi lasterketak eta oro har lasterketak modu berezi baten bizi direla, baina Gipuzkoako Goierria badu hortan aipamen berezia. Bertan ospatzen diren lasterketak beti izaten dira ongi antolatutakoak eta bertakoen partehartzea eta ikusleen animoek badute xarma propioa. Jai eguna bihurtzen du korrikalariontzat bertara egiten dugun txangoa.

Beraz, hara abiatu ginen hainbat taldekide: Gorka, Ricardo, Eneko, Enrike, Ander eta ni neu, JJ.

Oraingo honetan Mikel Garmendia, bertako korrikalaria, omentzen zuten lasterketa honekin. 2008. urtean istripu batez hil zen eta oso ezaguna genuen mendiko lasterketen munduan. Omenaldi ederra izan zen, bai horixe.

Dena den, Idiazabal herria beste mendi inguru ospetsuak dituenez inguruan, ibilbidea nolakoa izango zen ez geneukan argi. Baina aitortu beharra daukagu ibilbide benetan ederra izan zela;  dibertigarria, bidezidor hestuak, larre malkartsuak, lokaztutako jeitsierak.... Benetako mendi lasterketa!!

9:30ak iritsi ziren eta pin-pan-fuego!! Ziztu bizian abiatu ginen maldan gora. Aurrera egin zuten Eneko, Gorka eta Enrike eta atzerago geratu ginen Ricardo eta biok. Emaitzak, ba denetarik. Ander junior mailako lasterketan bigarren izan zen, eta bide batez Junior mailako Euskal Kopa eskuratu zuen: Zorionak motel!!. Eneko 27. postuan heldu zen, sasoiko dagoela erakutsiz, Enrikek lan txukuna egin zuen ere hilabete luzeen ondoren lesionatuta ibili bada. Gorka eta Ricardo, beti hor, lasterketa txukunak egiten. Eta ni neu lehena Idiazabalen, erretiratu eta gero jakina. Orkatila bihurritu eta Etxegaraten bertan behera utzi nituen nire lanak. Idiazabalera heldu eta masaiak ematen zebiltzan hiru neska jator. Batek nire orkatila hartu eta zer edo zer egin zuen, berehala sendatzeko bidea hartzeko, milesker!

Sari banaketa eta gero bazkari herrikoia zegoen korrikalari eta laguntzaileentzat. Giro aparta polikiroldegian, eta hainbat barre paella eta sagardo artean. Egun borobila. Datorren urtean zalantza izpirik gabe bertara joango gara, bai hoixe!!

Jj Zurikarai